NGUVU YA ULICHONACHO

THE POWER OF YOUR        POSSESION! NGUVU YA ULICHONACHO!

1

m k

 

         YALIYOMO;

SEHEMU YA KWANZA……….MATOKEO YANAYOSABABISHWA NA ULICHONACHO.

SEHEMU YA PILI……………………...UMILIKI WA FANI NA UJUZI

SEHEMU YA TATU……………………..WEWE NI NANI?

SEHEMU YA NNE……………………..UNA NINI MKONONI MWAKO?[MTAJI]

SEHEMU YA TANO……………………NAMNA YA KUANZA KUTUMIA ULICHONACHO

SEHEMU YA SITA ……………………..SHUKRANI

SEHEMU YA SABA…….………………..KUHUSU MWANDISHI,

 SEHEMU YA KWANZA

 MATOKEO YANAYOSABABISHWA NA ULICHONACHO.

Kila kitu ambacho unakimiliki huwa kina uwezo wa kukuletea matokeo ya aina kuu mbili

Yaani matokeo haya ni

·         Kukuinua[kukupandisha viwango vya mafanikio yako]

·         Kukuharibu .[kukushusha chini]

Haya ni matokeo ambayo huwezi kuyakwepa maana kwa vyovyote vile ni lazima mojawapo likupate

Mfano 1

Ukimiliki gari linaweza kukufanya aidha ukawa masikini kwa sababu ya gharama ya uendeshaji au ukawa tajiri kwa sababu ya matumizi sahihi ya hilo gari lako

Hasa kama utalitumia gari lako kuzurula mtaani na kumaliza mafuta bila kuwa na chanzo kizuri cha kukuingizia kipato.

Mfano 2.

Ukiwa na mume au mke anao uwezo wa kukufanya aidha uone dunia ni mahali sahihi pa kuishi kwa amani kama mbingu ndogo

 au

Anao uwezo wa kukufanya uone dunia ni jehanamu ndogo unapoisubiri iliyokubwa.

Kwa mifano hii unaweza kuona kwa kila unachokimiliki huwa kuna nguvu ya ndani ya aidha kukuletea matokeo chanya au hasi katika maisha yako.

Mfano 3

Unaweza ukapata watoto katika ndoa yako lakini watoto wako wakafanyika kuwa mwiba katika maisha yako hadi ukafikia wakati wa kujuta ni kwanini Mungu amekupatia watoto.

Lakini pia ufahamu kuwa unaweza kupata watoto halafu watoto wako wakakufanya uone furaha ya  kuwa na watoto wako.sasa kila kitu huwa kina nguvu aidha ya kukufanya ufurahi au ulie.

Kati ya watu ambao ninadhani walipata shida sana na pengine walijilaumu sana kwa matokeo yaliyosababishwa na wanavyo vimiliki ninadhani mojawapo ni ADAMU

Mwanzo 3;1-7

Katika kitabu hiki cha mwanzo sura ya 3, Biblia inaeleza kwa habari ya majanga makubwa ambayo mke wa Adamu aliweza kumsababishia mumewe na akajisababishia nayeye mwenyewe pia.

Ni baada ya kudanganywa na Yule nyoka[shetani] na hatimaye akavunja sheria za Bustani ya Edeni,mwishoni wanafukuzwa kukaa Edeni na kupewa adhabu ya kula kwa jasho na kuzaa kwa uchungu.

Mfano mwingine ni ule wa Samsoni na Delila

Tunaona jinsi ambavyo yawezekana samsoni alijuta sana kuwa na Delila kama mke wake baada ya kuingia katika mateso makubwa kwa sababu ya Yule  Delila.

Sasa hiyo ni baadhi tu ya mifano,lakini unaweza kuoa mwanamke  au kuolewa na mwanaume anayeweza akabadilisha kabisa   historia ya maisha yako kwa sababu ya tabia mbalimbali ambazo mtu Yule anazo  ,hatimaye ukaingia katika matatizo.

Kupitia kitabu hiki,tunajifunza vile Samsoni alivoweza kufanyiwa kitu kibaya na cha kinyama kabisa na mwanamke aliyempenda sana[ Delila],unaweza ukafikiri ni kwa jinsi gani inavyoumiza kusalitiwa na mtu unaye mpenda sana.

Naweka mkazo  kukutaarifu kuwa ,watu ulionao au kitu ulichonacho kina uwezo wa kubadilisha hatima ya maisha yako katika namna chanya au namna hasi.

                                   2.SHERIA ZA UMILIKI HALALI

Ili uweze kumiliki kitu kiuhalali kuna vigezo au sheria ambazo nilazima uzipitie,pasipo kupitia hizi hatua utapata shida sana kwa sababu  ule umiliki wako utakuwa unakosa baadhi ya vionjo.Ingekuwa ni chakula tungesema ili chakula kiwe kitamu kuna vitu vinatakiwa viwepo kama vile chumvi,mafuta ,vitunguu n.k.

A.     NI LAZIMA UINGIE GHARAMA YA UNACHOKIMILIKI

Kuna watu huwa wanapenda kumiliki vitu viwe vya kwao ,lakini kwa bahati mbaya hawataki kupitia ule mchakato wa kuingia Gharama ya umiliki halali.Mfano mzuri , unaweza kununua kiwanja ,lakini ukaona uvivu kwenda kwa watu wa ardhi ili wakupimie na kukupatia hati miliki inayokutambulisha wewe kuwa mmiliki halali wa kile kiwanja.

Sasa ili ufanikiwe kuwa mmiliki halali ni lazima uwe na hati ya kwako, malizia kulipa gharama zote za lazima ili uwe na kitu cha kwako mwenyewe.Jambo hili wala sio la kibinadamu au kimwili sana,hata biblia inasisitiza maeneo mengi sana, na inatoa mifano ya watu ambao walilazimika kuingia katika gharama za lazima katika umiliki wao.Kwahiyo usiwe mjinga ,unavoenda katika umiliki wa mambo hakikisha una kamilisha  kulipa gharama zote za umiliki halali.

KUTOKA KATIKA BIBLIA

Yeremia 32;9

Huyu jamaa alinunua shamba ,akalipa gharama ya lile shamba akapewa na hati yake.  Sasa wewe ni nani hata usione umuhimu wa kulipa gharama ya unavyovimiliki na hatimaye ukapewa hati za kwako za umiliki halali?.

Mwanzo 23;16-18

Hapa utakutana na Ibrahimu baba wa Imani ,ambaye na yeye hakuwa nyuma , aliamua kulinunua shamba katika makpela ,na akaandikishana na mashahidi na akapewa  hati yake halali ya umiliki halali.

Hatuna sababu ya kujitetea wakristo kwa kushindwa kumiliki vitu vyetu kiuhalali.pambana hadi upate umiliki halali ,kubali kulipa gharama ya vile unavyotakiwa kuvimiliki.

B.      TAFUTA MASHAHIDI HALALI WAKATI WA KUMILIKI

Mashahidi ni watu muhimu sana ambao wanakuwa na uwezo wa kukutetea wewe wakati ambao unakutwa na changamoto za vile unavyo vimiliki.

Hata katika kesi nyingi za migogoro ya Ardhi,kuna mambo mengi huwa yanatokea ,unaweza kuzulumiwa mali ambayo ni halali yako ,lakini kwa sababu hauna mashahidi wa kuthibitisha kuwa ulichinacho ni cha kwako.

Hata ndoa, huwa zinakuwa na mashahidi halali,na ndiyo maana hakuna ndoa halali ambayo huwa inafungwa pasipokuwa na mashahidi.

Mungu anatambua umuhimu wa mashahidi katika kila kitu tunachokifanya ,na ndiyo maana tunatakiwa kufuata utaratibu huu wa kutafuta mashahidi halali katika kila kitu tunachokimiliki.

KUTOKA KATIKA BIBLIA

Hili jambo ni la kiroho kabisa ,na Mungu hapendi wakristo wajinga wajinga wasiofahamu kanuni na taratibu zinazotakiwa kufuatwa katika umiliki halali.

Yeremeia 32;9-10

Mwanzo 23;17-19

Bado katika mifano hii utaona jinsi ambavyo mashahidi wanatakiwa katika kila kitu au thamani uliyo nayo.Mungu atusaidie sana wakristo tuweze kuwa makini katika vitu ambavyo Mungu wetu ametupatia tuvimiliki.Tafuta mashahidi halali!.

C.      KUBALI MAUMIVU MAANA YANAKUJENGEA UMILIKI WA NDANI

Ili uweze kuwa mmiliki halali ,gharama ya maumivu ya kile kitu unachobeba pia inahusika sana kukutengenezea saikolojia ya kukimiliki na kukitunza kile kitu.

Mfano

Kuku huwa ana atamia mayai yake kwa muda wa siku 21.Katika siku hizo 21,kuku huwa anakubali kushinda  njaa na kukaa eneo moja kwa muda mrefu sana,hata kama kuna hatari, kuku huwa anakaa akiwa amelalia mayai yake hivyohivyo.

Baada ya siku 21 kuku hutotoa vifaranga wake,sasa kuanzia hapo wewe jifanye unajipitisha karibu ya Yule kifaranga wa kuku ,utadonolewa ndugu yangu hata kama ni mtu mzima lazima utakuwa na ile hofu Fulani maana ule umiliki unampatia nguvu na utisho dhidi ya maadui zake.

Sasa ile gharama ya maumivu uliyoipata wakati wa kujiandaa kumiliki ulichonacho huwa inachangia sana wewe kukupatia umiliki halali na  umakini wa vitu unavyo vimiliki,inakuongezea ule umakini wa ndani.

KUTOKA KATIKA BIBLIA

Mathayo 1;25

Mariamu anakuwa mama wa Yesu [cheo kikubwa sana hicho] kwa sababu ya ile gharama ya kubeba ujauzito wa Bwana Yesu kwa muda wa miezi tisa hadi akajifungua mtoto wa kiume.

Anasimama kifua mbele pamoja na Yusufu Kumtetea Bwana Yesu  dhidi ya Yule Herode aliyetaka kumuangamiza ,Mariamua na Yusufu wanakimbilia Misri kumtetea Yesu ambaye ni mtoto wao kwa sababu  kuna gharama alilipa kumpata Yesu ,na ndiyo inampatia uhalali wa kuwa mama wa Yesu.

Kuna mwanamke gani ambaye anazaa kwa uchungu halafu hamtetei mtoto wake anapopita katika changamoto ?

Najua wapo wazazi  ambao hata hawajali watoto wao ,lakini ukweli ni kwamba wanatakiwa kuwalinda na kuwatetea watoto wao.

 SEHEMU YA  PILI

 UMILIKI WA FANI NA UJUZI

Fani au ujuzi Fulani ni kile kitu ambacho mtu ameumbiwa kukifanya hata kabla hajaenda shule

Ningeweza kusema ni uwezo au ujuzi asilia wa kufanya kitu Fulani .watu wengine huenda mbali wakasema ni kile kipaji maalumu ambacho mtu anazaliwa nacho.

Maana ya kuzaliwa nacho ni ya kibinadamu,lakini Kimungu tunasema ni kupewa na Mungu.

Sasa kile kitu ambacho usipokifanya unasikia kama kuna kitu kinakosekana moyoni mwako[kile  unachokipenda kuliko vitu vyote] kinaitwa kipaji au fani yako

Mifano ya baadhi ya fani za watu

·         Fundi cherehani hodari

·         Mchezaji wa mpira hodari

·         Mpigaji wa kinanda hodari

·         Mpika maandazi hodari

·         Mwimbaji hodari

·         Mkulima hodari

·         Mchungaji hodari

·         Mwana riadha hodari

Na vingine vingi sana.hiyo hodari niliyoiweka mwishoni mwa kila kipaji wala isikusumbue,nimeitumia tu ili iweze kukupatia hamasa,maana natambua kabisa kuwa kila kitu huwa kinaanzia chini kisha kinapanda juu,wala usiwe na hofu hata kama wewe bado hujafika katika ngazi ya uhodari ,waweza kuanzia hapohapo chini halafu ukajikuta mwisho wa siku umepandishwa viwango kabisa.

Sasa kitu cha muhimu hapa ni kujua fani yako au kipaji chako wewe ni kipi?

Ushuhuda!

Kuna rafiki yangu mmoja ,baba yake alijitahidi sana kumpeleka shule ili akasome.Na alimpeleka shule ya sheria,

Cha kushangaza sana Yule jamaa alikuwa anenda shule asubuhi ,ikifika mchana kabla yavipindi kuisha anatoroka na kurudi  nyumbani,kwenda kushughulikia mifugo yake ,maana alikuwa ameanza mradi wa kufuga nguruwe.

Waligombana sana na baba yake ,kwa maana kila aliporudi nyumbani , baba yake alimsema na kumkaripia sana ,Yule kijana kwa kumuonea huruma baba yake ,aliamua kuendelea kusoma kwa bidii ili tu amalize chuo salama.

Ni kweli kama ilivyo kawaida ,lisilo na mwanzo halikosi mwisho,Yule kijana alihitimu shule sal,na akapata ufaulu wa kawaida tu.

Sasa baada ya kuhitimu chuo ,akiwa na shahada yake ya kwanza ya sheria ,mchakato wa kutafuta kazi ukaanza,alizunguka kwenye  taasisi nyingi na kwenye maofisi ya watu mbalimbali lakini hakupata kazi.

Alimlaumu sana babayake kuwa kwanini alimlazimisha kusoma fani asiyoitaka na tena fani yenyewe haina hata ajira?

Baadaye alikata tamaa akaamua kurudi kwenye mradi wake wa kufuga nguruwe.

Cha kushangaza ndani ya muda mfupi sana ,rafiki yangu alifanikiwa kufuga nguruwe wengi sana waliompatia kipato cha kutosha kuweza kuanzisha kampuni yake ya usambazaji wa nyama za nguruwe alumaarufu kama kitimoto,na akapata mafanikio makubwa sana kupitia kazi ile aliyokuwa anaifanya,

Funzo!

Hapa duniani ,vyeti vya darasani ni makaratasi tu,cha muhimu zaidi je kichwani unayo akili ya maisha?

Kuwa na elimu ni muhimu sana ,lakini kuwa na akili ya kutumia kipaji chako zaidi ni muhimu zaidi!

Kuna mtu mmoja alisema

Kipaji kinalipa kuliko hata taaluma utakayoisomea.Ninakubaliana na huyu bwana kwa asilimia zote

                                        FAIDA ZA KUTUMIA KIPAJI CHAKO

Zifuatazo ni faida chache za kuamua kukitumia kipaji chako au fani yako;

1.       UTAFURAHIA KAZI UNAYOIFANYA

Hapa  Duniani ,hakuna kitu kizuri kama vile kufanya kazi au kitu unachokipenda.Bila shaka mtu akiwa na kipaji maana yake ni kile kitu ambacho yeye mwenyewe anakipenda,kwahiyo kwa mtu huyo kufanya kazi ile haitakuwa mzigo tena kwake.

Mfano mwingine ni huu!

Hakuna raha hapa Duniani kama kuoa au kuolewa na mtu unayempenda kutoka moyoni

Ni furaha ya ajabu sana,na hata migogoro ndani ya nyumba isiyokuwa ya msingi huwa inapungua

Sasa wewe oa au olewa na mtu usiyempenda,hata akitokea nyumbani kwako utahisi kama mnyama Fulani ndiyo anaingia ndani ya nyumba.

Nakushauri anza kufanya kitu cha kipaji chako,hautaona shida kufanya ile kazi ,na hata kama utapitia changamoto katika hiyo kazi ,itakuwa rahisi sana kwako kuweza kuivumilia na kupanda viwango vingine katika kile unachokifanya.

2.      KIPAJI KITAKUPATIA UMAARUFU KULIKO KAZI ULIYO ISOMEA

Hii ndiyo pointi ambayo hata mimi huwa naifurahia sana .Maana hakuna mtu ambaye hapendi kuwa maarufu,

Sasa hebu jaribu kufwatilia katika watu maarufu na wakubwa hapa duniani je kuna Profesa maarufu kuliko mwanamuziki maarufu? Utagundua kuwa

Wasomi maarufu ni wachache sana,lakini watu wanaofanya shughuli za vipaji huwa wanakuwa maarufu zaidi

Namaanisha kuwa ,watu wanaofanya shughuli za vipaji huwa wanakuwa na mafanikio makubwa pengine kuliko hata wale waliosoma sana

Naomba tuelewane vizuri hapa,simaanishi kuwa watu wasisome ,hapana ,,ninamaanisha kuwa ukisoma ni vizuri,lakini ukisoma na kukitumia kipaji chako ni vizuri zaidi.

3.       KIPAJI KINAKUPELEKA  KUWA KARIBU NA WAKUU

Ni rahisi sana kwa muheshimiwa Rais wa Nchi kukutana na watu maarufu wenye vipaji,kuliko kukutana na wasomi

Unaweza kuwa wewe darasa la saba tu ,lakini unakipaji cha muziki,ukajikuta wewe unatumiwa sana na serikali yako katika kugusa jamii katika maeneo Fulani Fulani,lakini mtu aliye na elimu yake utamkuta yuko bize sana ofisini kwake

Unakuta mtu ni daktari,sasa muda wa kuwa karibu na wakuu wa nchi atautoa wapi wakati huo kazi aliyoisomea itamtaka aende kukaa hospitalini kutibu wagonjwa?

Ukitaka kuishi maisha ya uhuru na amani ,tumia kipaji chako.

SHOW ME YOUR TALENT AND IWILL SHOW YOU GREATNESS!

NASAHA ZANGU KWAKO!

Ukimuuliza rafiki yako wa karibu kuwa yeye anamiliki nini katika maisha yake usishangae kuona anakuorodheshea vitu vingi sana ambavyo yawezekana hujawahi kuhisi kuwa yuko navyo,lakini cha kushangaza sana unaweza kuona amesahau kutaja fani aliyonayo ambayo yamkini ndiyo inayompatia pesa za kuweza kukaa mjini.

Watu wengi tumekuwa tukiishi maisha ya nje ya tulivyonavyo kwa muda mrefu kiasi ambacho tunatumia muda mchache sana kufanya vitu ambavyo ni vya kwetu ila asilimia 90% tunafanya vitu vya watu wengine.

Unapokuwa unafanya kitu ambacho sio cha kwako kuna mambo mengi yanaweza kukukuta

MAMBO YANAYOWEZA KUKUKUTA UKIWA UNAFANYA KITU KISICHOKUWA CHA KWAKO.

·         KUFANYA CHINI YA UBORA-yaani hata ukijitahidi kiasi gani unaweza kujikuta bado haufikii ule ubora ambao hasa unatakiwa kwa mtu wa kitu kile aufikie.

Nilipokuwa bado mdogo nasoma shule ya sekondari ,nilikuwa napenda sana kufuatilia michezo  hasa mpira wa miguu,kwa bahati mbaya sana mimi sikuwa na kipaji cha kucheza mpira.

Siku moja kulikuwa na mashindano ya kimadarasa,kutokana na kuisha kwa wachezaji katika darasa letu timu ya darasa letu ililazimika kuniingiza niweze kuwa moja ya wachezaji uwanjani yaani first eleven.

Nilifanikiwa kuingia uwanjani,lakini vituko vilivyoendelea uwanjani namwachia bwana.

Unajua kitu gani kilitokea? Yaani ilikuwa kila nikipewa pasi moja ,kabla sijaipeleka kwa mwingine ni lazima nianguke chini kwanza ,ile nasimama tu maadui wameshakwapua mpira na kumpasia adui yangu nabaki nazunguka tu.

Basi mdogo wangu alinikumbusha hadithi hii nikiwa nimekuwa mkubwa tayari nilicheka sana maana nimegundua sasa kuwa kilichokuwa kinanitesa pale haikuwa kutokujua mpira ,ila ilikuwa ni kufanya kitu ambacho hakikuwa fani yangu.

Sasa nirudi kwako

Yawezekana umehangaika kufanya kitu Fulani kwa muda mrefu sana,lakini kila siku umejikuta unafanya chini ya ubora,wala usijilaumu ila shukuru Mungu kuwa leo hii umepata majibu yako kuwa ni kwa sababu unafanya kitu ambacho siyo fani yako.

Asikudanganye mtu!

Unapofanya kitu ambacho ndichoulichoumbiwa kukifanya ,ubora wake utakaochipuka ni lazima utakutambulisha tu kuwa wewe ni mtu wa namna gani.

Kwahiyo hatupati shida kukutambua,maana ubora unaouonesha kwa kile unachokifanya utatuambia kuwa je ni cha kwako au unaiga kutoka kwa watu wengine.

·         NGUVU KUBWA MATOKEO KIDOGO

Narudi nyuma tena nikiwa shule,kuna jamaa alikuwa anapenda sana somo la hesabu lakini kwa bahati mbaya sana kila akijitahidi alikuwa anafeli ,lakini mtu huyohuyo alikuwa yuko vizuri sana katika masomo ya sanaa,kwahiyo pamoja na kuhangaika sana katika somo la hisabati,ukimleta kwenye sanaa utaipatapata!

Pamoja na juhudi zake zote za kulala darasani kusoma hesabu,lakini bado mtihani alipata alama ya kawaida sana ambayo hailingani na juhudi alizokuwa amezitumia katika kujiandaa.

Nataka nikwambie!

Unatumia juhudi kubwa lakini matokeo kidogo kwa sababu nyingi,ila kubwa huwa ni ile ya kufanya kitu kisichokuwa fani yako.

Mimi ni mwana muziki,najijua kuwa nimewekeza muda wangu mwingi sana katika kujifunza kinanda kuliko gitaa,japokuwa gitaa pia naweza kulicheza bila shida,lakini ukinipatia kinanda nitafanya kwa ubora zaidi kuliko gitaa,gitaa nitapiga tu kawaida ambavyo mtu yeyote mwenye uelewa wa gitaa atasema na wewe ni miongoni mwa wapigaji wa gitaa.

Lakini nikicheza piano,mtu atakwambia we jamaa uko vizuri!

Natolea mfano jamani,maana tutaanza kugombana na walokole wenzangu hapa mara oooh jamaa anajiinua na nini!

Tafadhali sana ,huu ni mfano utakaoweza kukusaidia kuelewa ninachokifundisha.

Ukirudi katika Biblia utakutana na jamaa mmoja anaitwa Daudi.Yule dogo aliitwa wakati ambao Taifa la Israeli liko katika misukosuko mikubwa ya kivita,alitokea mfilisti mmoja jina lake Goliath tena ambaye hajatahiriwa.

Daudi alitakiwa kupambana na huyu Goliath,kinachonishangaza hadi leo ni kwamba,mfalme alipojaribu kumpatia Daudi yale mavazi ya kivita na kombati za kijeshi,Dogo aliamua kuzivua akasema hizi hazitanifaa,na wala hakutaka hata kuchukua siraha za kisasa za kuweza kupambana na Yule mfilisti,

Unajua ni kwanini?

Daudi tayari alikuwa katika ARENA YAKE au UWANJA WAKE WA KUJIDAI

Kwa sababu hiyo Biblia inaeleza kuwa alichagua mawe laini matano,akatumia kombeo kuweza kumpiga Yule Goliath,na kwa hakika Goliath aliuwawa na Daudi kiurahisi sana,

Kile ulichonacho kinauwezo wa kukufanya usitumie nguvu kubwa katika kupambana lakini matokeo yakawa makubwa sana kwako.

1samweli 17;38-39,49-50

Daudi akamuua Yule mfilisti kwa kombeo lake na jiwe laini.

Elewa kuwa ili ushinde au upate matokeo makubwa ,sio lazima uwe na mtaji mkubwa lakini,ni lazima uwe unafanya kitu kilicho sahihi kwako[yaani cha kwako].

·         KUKATA TAMAA MAPEMA

Moja ya dalili kuwa kitu unachokifanya sio cha kwako ni ile hali ya kukata tama mapema

Nakwambia ukweli,kama kitu kiko damuni yaani ni cha kwako,hauwezi kukikatia tamaa hata kama kimekukatisha tamaa kiasi gani,

Mfano mzuri ni kwa mashabiki wa mpira  mfano SIMBA NA YANGA za Tanzania ambazo ni timu pinzani.

Kuna wakati timu yako unayoipenda sana inafungwa zaidi ya mara mbili mfululizo ,lakini bado unakuta mtu akikaa na washabiki wengine anajitangaza kuwa yeye bado ni shabiki wa timu ileile iliyofungwa mara kadhaa,

Nataka nikwambie,kitu kama ni cha kwako,haijalishi changamoto gani unapitia  bado kile kitu kitabaki moyoni mwako na ni lazima ipo siku utakifanya tena.

Mfano.

Ikatokea umempenda mwanamke Fulani au mwanaume Fulani ,hata itokee changamoto mbaya kiasi gani ikawakosanisha ila lazima utajikuta mwisho wa siku moyoni unatamani kama vile mngekuwa pamoja tena.ni kweli unaweza kuwa na ujasiri wa kusema muachane moja kwa  moja,lakini nakuhakikishia gharama ya kumtoa mtu Yule moyoni huwa ni kubwa kuliko ngharama ya kuanzisha mahusiano mapya.

Kwa hakika kitu kilicho cha kwako ,hakiwezi kukufanya ukakikatia tama mapema,hivyo ukiona unakata tama mapema maana yake ni kwamba hicho kitu sio cha kwako!.

Sasa basi ,hakikisha unatambua kitu cha kwako ,ili ukianza kukifanya ukifurahie na uweze kupata matokeo makubwa.Uzuri ni kwamba ,kitu kikiwa kwenye damu ,hata kama hakitakulipa kwa wakati bado utakuwa na moyo wa furaha wa kuendelea kukifanya,

Kinachotakiwa sana hapa ni ile furaha wakati unapofanya kitu chako,hakuna maana ya kufanya kitu ambacho haukifurahii,unajiongezea stress katika maisha yako,

                         DHANA YA PLACEBO KATIKA ULICHOKITEGEMEA

Kwa namna moja au nyingine,unaweza kujikuta wewe unapendelea kitu Fulani,lakini kwa namna isiyokuwa ya kawaida ukajikuta umepata kitu kingine tofauti na kile ulichokipenda ,lakini kikakupatia uwezo wa kupata fedha nyingi na wakati mwingine ukaona kama kinaziba lile pengo la kukosa kile ulichokitegemea kwa muda mrefu.

Katika lugha ya kitaalamu tunaita PLACEBO ACHIEVEMENTS au Mafanikio mbadala

Placebo-ni kile kitu kinachofanania na ukweli lakini sio kweli

Mfano

Mtu anayeamini sana nguvu ya dawa,kila anapoumwa ,siku anakuja kwako daktari ukaona huyu hana shida lakini ili awe sawa kisaikolojia ni lazima apewe dawa za aina Fulani hata kama hazitibu kile anachoumwa ila zitamfanya aamini kuwa amepewa dawa sahihi na atapona.

Wakati huo ukimpatia hata panadol tu ,jamaa ananyanyuka kitandani na kuamini kuwa ametibiwa vizuri na amepona

Sasa hata katika maisha yetu ,kuna wakati Mungu huwa anaruhusu placebo zitumike katika maisha yetu ili kututia moyo mahali ambapo anaona kabisa tumeinama sana mioyo yetu.

Unakumbuka kilichotokea kwa Ibrahimu alipokuwa hapati mtoto kwa muda mrefu,jamaa hata ngazi ya uvumilivu ilianza kupotea ,ikabidi Mungu atumie placebo ya ISHMAILI ambaye kimsingi sio mtoto wa mkewe Sarai .

ISHMAILI anazaliwa kwa kijakazi wa Sarai ,anakuwa faraja kidogo kwa Ibrahimu na Sarai ,lakini bado Mungu anasema Atampatia Ibrahimu mtoto atakayekuwa mrithi kupitia tumbo la Sarai mkewe.Hapa tunaona uwepo wa ISHMAILI ni Placebo tu,lakini ISAKA  MWENYEWE anakuja kuzaliwa baadaye

Mwanzo 16;15-16

                                               KAZI YA PLACEBO

·         Kukutia moyo ukikosa ulichokitegemea

·         Kulinda heshima yako

·         Kukuongezea imani

Ushauri wanguJitahidi sana usiridhike na placebo,tafuta kwa bidii kile kilicho halali yako!

  SEHEMU YA TATU

 WEWE NI NANI?

Natumai katika sura iliyopita nimejaribu kukufungua macho yako ili uweze kutambua mlengo mkuu wa kitabu hiki na somo hili la THE POWER OF YOUR POSSESION

Kiujumla ninazungumzia uwezo wa kitu ulichonacho au kipaji chako,ndoto yako ,namna ambavyo kinaweza kukusaidia kufikia malengo yako na mipango yako katika maisha.

Kile unacho kifanya ,ndicho kinachokutambulisha

Hutatakiwa kutumia matangazo ya hadhara kujitambulisha kuwa wewe ni muimbaji ,lakini kazi unayoifanya ndiyo itakayokutambulisha.

Nilipoanza kwa mara ya kwanza kuandika sermon zangu za OGS[online Gospel Sermons] wala hata sikuanza kujitambulisha kuwa mimi ni mwalimu, lakini kadiri siku zilivozidi kwenda nikakuta watu wananijia inbox na kuniita mwalimu wa neno la Mungu,na wengine wakaenda mbali sana wakaanza kuniita Mtumishi na wengine wakaniita Mchungaji.

Nataka niseme hivi!

Siyo lazima ujitambulishe kuwa wewe ni nani,ili watu waanze kuja kwako kupata aina ya huduma unayoitoa ,ila huduma unayoitoa au unayoifanya ndiyo itakayo kutambulisha kwa watu, na wao ndio watakao kutafuta.

Nakumbuka kipindi cha mitume katika kitabu cha matendo ya mitume,watu walipoona Petro anafanya mambo makubwa ,na kuna wakati hata kivuli chake tu kinaponya wagonjwa wao,ndipo watu wakazidi kumsonga Petro na watu wengi wakamwendea kupata huduma ,na ghafla umaarufu wa Petro ukaenea sana kwa zile kazi alizokuwa anazifanya za kuihubiri injili ya YESU KRISTO.

KAZI unazozifanya ndizo ambazo zitakutambulisha mbele ya mataifa na wanadunia wote,

Kuna mtu anasema;

Ningekuwa maarufu ningeanzisha biashara ya kuuza juisi ya embe!

Sasa kanuni iko hivi

Anza kuuza juisi ya embe ukiwa bado haujajulikana ,halafu kupitia kazi hiyo unayoifanya utatambulishwa kuwa wewe ni muuzaji bora wa juisi ya embe halafu utakuwa maarufu na wateja wako watakuwa ni wengi kupindukia.

Kuna watu wengi sana ,wanasingizia kutokufahamika kwao kama sababu ya kutofanya mambo Fulani katika maisha yao,lakini ukweli ni kwamba KAZI UNAYOIFANYA NDIYO ITAKAYO KUTAMBULISHA WEWE NA KUKUPATIA UMAARUFU UNAO UTAKA.

Ndugu yangu ,hii ni kanuni ya Kimungu na hakuna anayeweza kuipindua,unafanya kazi. ,kazi inakutambulisha katikati ya mataifa.sasa ni uamuzi wa kwako wewe kuamua aina gani ya kazi unayotaka ikutambulishe.

                  Mifano ya watu waliotambulishwa kwa kazi zao katika Biblia

1.PETRO.

Matendo 5;16-17

Huyu jamaa kwa kufanya kazi ya Mungu kwa uaminifu ,umaarufu wake ulichipuka na kuenea kwa haraka sana ,watu wakawa hata wanawaleta wagonjwa wao ili tu kivuli cha Petro kiwapitie  wakawa wanapona.

2.YUSUFU

Mwanzo 37;5   ,37;9   mwanzo 41;25

Jamaa kupitia kazi yake ya kutafsiri ndoto za watu anapata umaarufu na kuwa Waziri mkuu wa Nchi ya Misri.

3.MUSA&HARUNI

Kutoka 7;19,  Kutoka 8;5,   Kutoka 10;12-14

Kupitia kazi ya kuwaombea tu Ruhusa wana wa Israeli watoke Misri ,Musa anakuwa maarufu sana kwa Farao

Hivi ungekuwa ni wewe ungejisikiaje yaani unafanya kazi ambayo inakusogeza karibu na mkuu wa nchi kiasi ambacho mnajadiliana kwa pamoja?

Ingekuwa ndiyo Dunia ya sasa au Tanzania ya sasa kesho yake ungeshangaa katika vyombo vya habari wanaandika!

Breaking news -MUSA AONGEA NA RAISI NA KUMWAMBIA ATALETA VYURA TANZANIA NZIAMA !

Nakwambia ukweli,ingekuwa ni sasa ukifanya kazi kama aliyoifanya musa utajikuta dakika chache, umejulikana Dunia Nzima.

Nataka nikwambie kitu

Wewe ukitaka kutambulishwa ,basi chagua kazi maalumu utakayoanza kuifanya ,hata kama ni kuuza maandazi ,ukifanya kwa uaminifu utashangaa mji mzima wanakutambua kama Muuzaji maarufu wa maandazi bora ,na unapotambulika ndiyo sasa unapata wateja wengi na umaarufu wako unakua.

Sasa nina ugomvi mdogo na wakristo ambao hawaamini katika umaarufu.utanisamehe sana katika hili,Ila ukweli nikwamba ,unapoanza kufanya jambo kwa uaminifu Mungu huwa anakutambulisha kupitia kazi unayoifanya ,na baada ya hapo umaarufu unakuwa ni sehemu ya maisha yako hasa pale unapofanya kitu cha ndoto yako.

                      NAMNA YA KUCHAGUA KAZI  ITAKAYO KUTAMBULISHA

Sasa katika mfumo wa maisha yako ,naomba nikufundishe njia ya kuchagua aina ya kazi ambayo ungetaka ikutambulishe.na kwa hakika kama utatumia vigezo hivi ,aina hiyo ya kazi itakufanya ufanikiwe haraka na uwe vile ulivokuwa unaota maisha yako yawe siku zote;

Tumia vigezo vifuatavyo;

·         Kazi unayoichagua iwe ni kazi ambayo unaipenda kuliko kazi zote,.

Yaani kwa mfano mtu akaja kwako akiwa na pesa Bilioni moja halafu akakuuliza ungependa ufanye kazi gani endapo nikikupatia hizi pesa,kile kitu cha kwanza utakachokichagua kutoka moyoni ndicho hicho kiko katika damu yako na ndiyo kusudi la kuumbwa kwako

·         Iwe ni kazi ambayo msingi wake haujengwi kwa mtaji wa pesa.

Pesa huwa ni matokeo tu ,wala haipo katika mlinganyo wa kuanza kitu Fulani[equation]Namaanisha kuwa ,kitu ulichozaliwa nacho,hakitegemei uwepo wa pesa ndipo kiweze kutekelezeka ,ila kinategemea maamuzi ya mfanyaji kwa maana tunatambua kipaji cha mtu kwa urahisi sana pale ambapo anakuwa hana pesa.

Mara nyingi mtu akiwa hana pesa ,kuna aina Fulani ya vitu anapendelea kuvifanya ,na wakati mwingine huwa wakati wa mapumziko akitoka kazini anakohangaikia tumbo lake, akirudi nyumbani anaanza kufanya kitu anachokipenda kuliko vingine vyote.

Zamani wakati tunakua,tulikuwa tukitoka shule tunachukua mwiko wa kusongea ugali na kuanza kuigiza kama vile tunapiga gitaa wakati huo tukiimba sauti za gitaa midomoni mwetu ,mimi pamoja na kaka yangu,ilifika wakati hadi mama akawa anatuchapa kwa sababu saa zingine tunachukua mwiko masafi halafu tunaanza kuuchezea mithili ya wanaopiga magitaa.hii hali badaye iliendelea ikatuletea hali ya kugundua kuwa kumbe sisi ni wanamuziki kwa asili yetu ya ndani ,na ndiyo maana tulipoanza kujifunza masomo ya muziki haikuwa kazi ngumu kabisa kwetu,kuna wakati tulikuwa tunauelewa  wa muziki kabla hata mwalimu hajatufundisha.

Sasa ni mara ngapi umeona mtoto wako anafanya vitu ambavyo vinafanania na kitu Fulani halafu ukakipuuza? Mfano unaona mtoto wako anatengeneza magari ya vikopo wewe unamkemea na kumchapa.ingekuwa ni baada ya kujifunza somo hili ungetakiwa sasa kuanza kumlea huyo mtoto katika misingi ya uhandisi wa magari,na yamkini hata aina za shule ambazo utampeleka zinatakiwa kuwa ni shule za ufundi .ufurahi maana tayari una muhandisi  wa magari  katika nyumba yako.

Baada ya kukueleza mambo hayo sasa,chukua muda kutafakari ni kitu gani ambacho unao uwezo wa kukifanya  kwa ubora kabisa? Hicho kitu kwa hakika ndicho ambacho kitakutambulisha kuwa wewe ni nani.

 SEHEMU YA NNE

 UNANINI MKONONI MWAKO ? [MTAJI]

Katika sehemu iliyopita  nilikuwa nikizungumzia kwa habari ya namna ya kujua wewe ni nani?

Tumeona mambo ya msingi unayotakiwa kuyafanya kabla ya kuamua kuanza kufanya jambo Fulani katika maisha yako ,ambalo unategemea likuletee mafanikio makubwa katika maisha yako.Nimeeleza kuwa ,hata kama jambo unaliona kuwa ni dogo sana lakini unao uwezo wa kulitumia hilohilo likaleta matokeo makubwa sana katika maisha yako .

Katika sehemu hii ya nne, nataka tujiulize swali hili je UNANINI MKONONI MWAKO?

Maana ya swali hili kwa lugha nyingine ni  je KITU GANI KILICHOKO NDANI YA UWEZO WAKO?

Ndugu ya mpendwa

Kati ya swali la muhimu sana katika maisha yako ni kujiuliza na kujua kitu gani ambacho uko nacho mkononi ambacho kinaweza kutumika kama kianzio katika kupata vitu bora ambavyo Mungu amekuahidia.

THE POWER OF YOUR POSSESION imelenga kukutambulisha uwezo au matokeo makubwa ambayo kitu kidogo ulichonacho kinaweza kukuletea katika maisha yako.

Je ,hicho kitu kidogo ni kipi?

Ni ufundi ulionao[fundi seremala?

Fundi redio?

Fundi uashi?

Mwana muziki chipukizi?

Mfanya biashara?

Ni mtumishi wa uma?

Hivi vyote ni moja tu kati ya maswali unayotakiwa kujiuliza kuwa uko na kitu gani? Na inawezekana ikawa zaidi ya hayo wewe ni mwalimu,muhandisi,daktari,mkulima ,mfugaji,producer wa muziki ,mpiga picha,muhubiri,mama lishe nk;

Hivi vyote ni vitu unavyoweza kuwa navyo

Shida sio kuwa na hivi vitu,ila shida je unamaelekezo sahihi ya namna ya kuvitumia ili vikuletee matokeo makubwa unayoyataka katika maisha yako

Yaani unajua namna ya kuvitumia ili uione nguvu iliyomo katika hivyo vitu?

Sasa tuanzie hapa.

Kila kitu ulichonacho kinakuwa na thamani kwako pale ambapo unakuwa na maelekezo sahihi ya kukitumia na hatimaye kinakupatia matokeo makubwa /kinakufaa sana.

Mfano

Wewe unaweza kuwa na simu [smartphone]lakini usijue namna ya kuitumia ,kwahiyo utaishia kupiga na kupokea ,pamoja na kutuma na kupokea sms tu! Usijue kuwa kuna watu kupitia simu hizohizo wameweza kutengeneza na kupromote biashara zao na kujitangaza kibiashara na wanapata pesa nyingi kupitia simu.

Hapa ndipo utakapogundua kuwa ,shida sio kuwa na fani Fulani au kitu Fulani au kazi Fulani,ila shida iko hapa je unayo maelekezo sahihi ya namna ya kukitumia hicho ulicho nacho?

KUTOKA KATIKA BIBLIA

Naomba sasa nikupitishe katika Neno la Mungu kukuonesha jinsi ambavyo watu walikuwa na vitu kama walivyonavyo wengine ,lakini baada ya kupewa maelekezo ya namna ya kuvitumia viliweza kuleta mabadiliko na matokeo ya ajabu sana .

1.MUSA & FIMBO YAKE;

Kutoka 7;19

Bwana akamwambia Musa,mwambie Haruni ,shika fimbo yako,kaunyoshe mkono wako juu ya maji ya Misri,juu ya mito yao,juu ya vijito vyao,na juu ya maziwa ya maji yao,na juu ya visima vyote vya maji ili yageuke kuwa Damu ,nako kutakuwa na Damu katika nchi yote ya misri  katika vyombo vya mti na katika vyombo vya jiwe.

Katika andiko hili utaona mstari ule wa 20 pale chini .Baada ya Musa kufanya kama walivyopewa maelekezo ,maji yote ya misri yakawa damu!

Kutoka 8;5

Akapewa tena maelekezo ya kuitumia fimbo yake ,ikaleta vyura katika nchi ya misri

Kutoka9;22

Akapewa tena maelekezo ya kutumia fimbo yake ,kukaja mvua kubwa ya mawe katika Nchi ya misri.

Unaweza kuona jinsi gani FIMBO kitu kidogo kabisa alichokuwa nacho Musa kilivoweza kuleta matokeo makubwa sana baada ya kuwa kimetumika sawasawa na maelekezo maalumu.

Nataka nikwambie!.Kupitia ujumbe huu wa THE POWER OF YOUR POSSESION Mungu amenipatia neema ya kukueleza namna ambavyo utatakiwa kuvitumia vitu ulivyonavyo hata kama ni vidogo kiasi gani ili kusudi kupitia hivyo viweze kuleta matokeo makubwa katika maisha yako.

2.CHUPA YA MAFUTA & MWANAMKE MJANE

2falme 4;2

Elisha akamwambia ,nikufanyie nini?

Niambie una kitu gani nymbani?,akasema mimi mjakazi wako sina kitu nyumbani ,ila chupa ya mafuta.

Kupitia mfano huu,huyu mama hakuona kama chupa yake ya mafuta ilikuwa na msaada kwake tena baada ya kuwa mume wake amekufa ,na amemwachia madeni,lakini habari njema ni kwamba ,kupitia kile alichokuwa nacho yaani chupa ya mafuta ,alipopata maelekezo kutoka kwa ELISHA ,alikuwa tajiri wa mafuta.

Ukiendelea pale mstari wa 3……. Utaona mchakato mzima jinsi ulivyokuwa.

Masikini mama wa watu .ana madeni ,lakini anapokwenda kwa yule mtumishi wa Mungu akidhani labda anaweza kupata msaada wa pesa au vitu vikubwa vitakavyomsaidia kulipa madeni ,anakutana na swali gumu sana linalomtaka yeye mwenyewe aanze kujitathimini kuwa ana nini mkononi mwake,

Kuna wakati mwingine huwa tunamwendea Mungu tukiwa tunahuzuni sana tukidhani kuna vitu vikubwa sana ambavyo Mungu anaweza kuvitumia kubadilisha maisha yetu,lakini ukweli nikwamba ,chochote kile ulichonacho utakapopata maelekezo sahihi ya namna ya kuanza kukitumia kinauwezo wa kubadilisha kabisa maisha yako,

1falme 17;12

Bado biblia inaeleza kwa habari ya mjane mwingine aliyekuwa hana chakula na wakati huo ulikuwa ni msimu wa njaa,kupitia maelekezo aliyopewa na mtumishi wa Mungu alipata neema ya chakula cha kumtosha kuvuka msimu wote aliokuwa anaupitia katika maisha yake.

Shida sio kazi gani unayoifanya,shida ni je una maelekezo sahihi ya namna ya kuifanya hiyo kazi ikuletee matokeo makubwa?,lakini sharti ni kwamba hiyo kazi iwe ni ya kwako.ndio maana swali la kwanza kwa wale akina mama pamoja na musa pia ni UNANINI MKONONI MWAKO?

YAANI ,KITU GANI AMBACHO NI CHA KWAKO TUNAWEZA KUKITUMIA KUFANYA MAAJABU?

3.KIPAJI NA YUSUFU

Mimi huwa nasema ,kati ya watu ambao walikula bata kiulaini katika maisha yao ,ni pamoja na yusufu.alipata umaarufu kwa kitu kidogo sana .yaani kile kipaji tu cha kutafsiri ndoto ,hatimaye kinamfanya anakuwa WAZIRI MKUU.Hii inanipa moyo sana kuwa kitu chochote maadamu tu ni cha kwangu,endapo nitakitumia vizuri kwa msaada wa Mungu naweza kufanya mambo makuu

Mwanzo 41;25, Vilevile Katika    Ebrania 13;6  biblia inasema Bwana ndiye anisaidiaye ,sitaogopa!

  SEHEMU YA TANO

 NAMNA YA KUANZA KUKITUMIA ULICHONACHO

Kila kitu huwa kina kanuni zake,

Katika sura hii nategemea sasa tayari umekwisha jitambua kuwa wewe ni nani ,na umeumbwa kwa kusudi gani,na kitu gani unatamani kuanza kukifanya .kama endapo umegundua kuwa yamkini ulikuwa unafanya kitu ambacho siyo cha kwako ,au ulikuwa unafanya kitu ambacho ni placebo,lakini sasa unataka kuanza kufanya kitu sahihi kwako.Maelekezo yafuatayo yatakusaidia sana kama ukizingatia kwa umakini na kuyafuata.

Unapotaka kuanza kufanya kitu cha ndoto yako ,fanya mambo haya ;

1.TENGENEZA SHAUKU YA NDANI IFIKE KIWANGO CHA KUTOVUMILIKA

Kwa lugha nyingine[Create your ambition to the level of intollelance]

Moja kati ya sermon nilizoziandika tarehe 16,17 januari ilikuwa inasema LET YOUR ANGER MOTIVATE YOU!

Unapofikia pointi ya kukionea hasira kitu kinachokutesa ,unapata nafasi ya kutengeneza mazingira mazuri kwaajili ya kuchomoka katika eneo ulilopo.

Mfano

Ikiwa wewe umechoka na maisha ya kupungukiwa pesa ,au umasikini kwa ujumla wake,ile hasira ya ndani inapozidi uvumilivu wako utatafuta njia yeyote ile ili uweze kuepukana na umasikini .Sasa usinielewe vibaya ,maana ya umasikini sio kukosa pesa tu kama wewe unavyotafsiri.Wakati mwigine umasikini huwa ni kutoweza kufanya jambo ambalo ni sehemu ya maisha yako au kutoweza kutimiliza malengo ya maisha yako.

Kwa maana hiyo,umasikini ni hali yeyote ile inayoweza kukuzuia wewe kutimiza ndoto yako.unaweza kuwa na pesa za kutosha sana hata za kuwapatia wengine ,lakini kama umeshindwa kutimiza ndoto yako basi wewe ni masikini wa uwezo wa kutimiza ndoto zako.

Sasa hatua ya kwanza ili uweze kutimiza ndoto yako ni kutengeneza shauku ya ndani itakayokuwa na nguvu ya kupenya kila aina ya changamoto mradi tu ufikie ndoto yako.

AZIMIA KUTOKA MOYONI!

2falme 7;3-5

Hapa biblia inawataja wakoma wanne ambao ilifika wakati wakaona hawana njia nyingine zaidi ya kuamua kwenda upande wa adui zao yaani  LIWALO NA LIWE!

Walipoamua kuanza kwenda ,ndipo hapo Bwana akasikizisha kishindo cha miguu yao mbele ya adui zao na hatimaye adui wakawakimbia wakoma.

DECIDE TO START! .DECIDE TO MOVE! ,DECIDE TO DO!

2falme 5;1-14

Hapa tunakutana na Jemedari wa vita NAAMANI lakini huyu jamaa alikuwa na ukoma.akaamua kutoka moyoni kuwa anataka kupona

Yale maamuzi ya ndani ,yalimfanya pamoja na ujemedari wake wote ,aende akajirushe katika mto yoldani mara saba

Kumbuka kwa nafasi yake ya kiserikali kwenda kuanza kujitumbukiza katika mto yolodani,mto mchafu,ilikuwa ni fedheha kubwa sana kwake,na ndio maana ukifwatilia utagundua kuna wakati alitaka kukataa kufuata maelekezo lakini watumishi wake wakamshauri ,alipoamua kwenda kuanza kujichovya katika mto yolodani mara saba ndipo akatoka akiwa na ngozi nzuri kama ya mtoto mchanga.yaani ukoma wake ukamachialia.

Nataka nikwambie

Maamuzi ya kuamua kutoka hapo ulipo na kuanza kukitumia kile kipaji chako au kuanza kufanya kazi ambayo ndiyo ndoto yako yanakutaka wewe mwenyewe usiwe mtu wa kuteteleka kimaamuzi.Ukiisha amua ,amua kwenda mbele moja kwa moja ,hapo ndipo mwanzo wa mafanikio yako utafunguliwa rasmi.

2.TAFUTA WATU SAHIHI

Katika kila kitu unachokifanya huwa kuna watu ambao ni tayari wamebobea katika eneo hilo.kama ukitaka kuanza kufanya kile kitu utatakiwa kupata taarifa sahihi kutoka kwa watu sahihi.ninaposema watu sahihi ninamaanisha kuwa wale watu wenye ujuzi na maarifa sahihi kuhusu fani yako

Mfano.

Kama wewe unataka kuwa mwanamuziki bora ,sharti la kwanza hakikisha unakutana na wanamuziki ambao watakuambukiza maarifa sahihi kuhusu muziki.

Utakuwa mtu wa ajabu sana kama wewe una fani ya biashara,ila unaenda kuomba ushauri wa kibiashara kwa afisa mifugo au kwa mkulima.

Ninachojaribu kukueleza hapa ni ile hali ya kuamua kutafuta mahali maarifa sahihi kuhusu kitu unachokifanya yanapatikana.

KUTOKA KATIKA BIBLIA

Kwakuwa neno la Mungu ndio muongozo wetu ,hebu tutumie dakika hizi chache nikupitishe kwa watu kadha wa kadha ambao walitafuta watu sahihi katika kufanya au kutimiza ndoto zao.

A.NAAMANI   ALIMTAFUTA   ELISHA

2falme 5;3

Naamani alipogundua kuwa ana tatizo la ukoma,aliamua kwenda kwa mtu sahihi anayeweza kumsaidia katika tatizo au ndoto yake ya kupona,ndio sasa akafunga safari kwenda kwa Elisha.

B.SAULI[PAULO]   ALIMTAFUTA   ANANIA.

Jamaa mwingine ambaye alikutana na mtu sahihi ndoto zake zikaanzia pale kutimia ni Paulo aliyekuwa sauli kwa wakati ule,huyu Bwana alikutana na Anania ndipo alipoombewa na kupata kuona tena.

Matendo 9;1-16,17-18

Ndoto yake ya kuona ,inawezekana isingetimia tena ,ila mtu sahihi aliyeandaliwa kwaajili yake alipokutana nae na kumpatia maelekezo pamoja na maombezi ndipo Sauli akapata kuona tena na ndiye Paulo mtume.

Ninachojaribu kukueleza ni kwamba ,jitahidi sana kutafuta watu sahihi ambao wamebeba vitu kama vya kwako .

3.CHAGUA MBINU YA KWAKO YA KUITUMIA[CHOOSE YOUR STYLE]

Kati ya jambo ambalo linatukwamisha watu wengi sana katika harakati za kuanza kuzitumia fani tulizonazo au kipaji au kutimiza ndoto zetu ni ile tabia ya kuiga watu wengine na kutaka kukopi au kuiga  kila kitu ambacho wanakifanya wengine katika eneo hilo.Nimekutana na wahubiri wa injili wanaochipukia wamefikia hatua ya kuiga hadi sauti za watumishi wakubwa ambao wamekuwa wakiwafwatili,binafsi sipendi sana mtu anayependa kuigaiga na kukopi mambo ya watu wengine,japokuwa Biblia inaeleza kuwa tuige yaliyo mema,ila haikumaanisha tukose mbinu za kwetu za kiufunuo wa kwetu.ushauri wangu kwa waimbaji wa nyimbo pamoja na wahubiri,hebu tafuta style ya kwako ambayo Mungu amekupatia kama njia ya kufikisha ujumbe kwa watu wake.acha tabia ya kuiga iga huduma za watu.

Hasara za kuiga ni kwamba ,utatumia nguvu kubwa sana kufanya kitu halafu wala usikifanye kwa ubora uliokuwa unatakiwa

Kwa bahati nzuri sana Mungu wetu ameandaa mbinu ya kwako peke yako katika kila kitu ambacho amekupatia kukitekeleza.

Na hata katika biashara yako,ukiishia kuiga wengine wanachokifanya  unaendelea kuwapatia soko wale unaowaiga ,ila hautangazi soko lako mwenyewe.

Sasa katika kuanza kutumia fani yako au kipaji chako,au chochote ambacho ndicho ndoto yako hakikisha una mbinu ya kwako peke yako utakayoitumia kutekeleza kile kitu

Nina uhakika Mungu wetu anazo njia nyingi sana za kukusaidia kujua ni kwa namna gani uanze kutekeleza yale unayotakiwa kuyatekeleza.

KUTOKA KATIKA BIBLIA

Hebu turudi kwenye katiba yetu mara moja

Yoshua 6;3-20

Ebrania 11;30

Hapa inaelezea jinsi ambavyo Yoshua alitakiwa kuwaongoza wale wana wa Israeli katika kuuingia mji wa Yeriko,Kinachonishangaza hapa ni ile mbinu ya kivita ambayo ilitumika wakati ule .

Ni kweli tumezoea kuona watu wanaoingia katika vita na kuvamia mji ambao ni boma ni lazima waende pale wakiwa na siraha mbalimbali zitakazowasaidia kupambana na hatimaye kuingia katika ule mji na kuteka nyara.Lakini Biblia inaeleza kuwa ,Mungu alimpatia mbinu ya tofauti kabisa mtumishi wa Mungu Yoshua,badala ya kwenda na siraha kubwa wao waliambiwa waende na vitu kama;Matarumbeta,Kupiga makelele na Kuzunguka ukuta mara saba.

Ninauhakika asilimia mia moja kuna baadhi ya watu mle ndani walikuwa wanamcheka Yoshua kiongozi wao moyoni,kuwa jamaa sasa anazeeka vibaya jamani.sasa  anatuambia tukapambane vita ili tuteke mji wa Yeriko na matarumbeta  badala yakatumike kuimba kwaya huko!

Sijajua ungekuwa ni wewe mwenzangu uko miongoni mwa wale jamaa ungesemaje pia ,yamkini ungekuwa na maneno mengi ya kumshauri Yoshua kwa kuhisi amechanganyikiwa,lakini nikwambie tu kuwa;

Mungu anapokupatia kitu cha kufanya ,huwa anakupatia na mbinu za kukitimiza hicho kitu.

Kwahiyo ni jukumu lako kuanza kutafuta mbinu  ya kwako ya kuweza kuanzisha kitu cha kwako

Kuwa wa tofauti na wengine,ule utofauti ndio ambao utakutambulisha wewe kama mtu wa pekee.

4.      KUWA KATIKA MAZINGIRA SAHIHI

Moja kati ya vitu ambavyo huwa vinatufanya tushindwe kuanza kufanya vitu ambavyo ni ndoto zetu ni mazingira.Kuna mazingira mengine kwakweli huwa yanakatisha tama sana,sasa kuna watu huwa wanajifanya wao ni mabingwa wa kuvumilia ugumu wa mazingira,mwisho wa siku mambo yao yanaharibika kwa sababu za kimazingira.

Nchi na vyote vilivyomo ni mali ya Bwana ,na tena Mungu wetu ametupatia kumiliki vitu vyotee na kila sehemu tutakayo ikanyaga tumepewa na Bwana.

Sasa wewe kama hutaamua kutafuta mazingira mengine yatakayokubeba katika kile kilichopo ndani yako ,usitegemee kuinuka na fani yako,Japokuwa ni kweli Mungu anaweza kukuambia ukae eneo fulani hata kama ni gumu sana kiuchumi,ila hakikisha ni yeye ndiye kasema ,na huwa anakusudi maalumu kwa ajili yako

 SHUKRANI

Ninamshukuru sana Mungu kwa neema na uzima ,na kunipatia uwezo wa kuandika kitabu hiki.sifa na utukufu zimrudie yeye.

Ninamshukuru mkewangu kipenzi Irene Benny Chavala,kwa kuwa mke bora na kunishauri katika mengi wakati nikiwa naandika kitabu hiki,huduma yako ni kubwa mkewangu asante sana kwa kuwa mama mlezi bora wa huduma yangu.

Ninawashukuru wanafamilia wote wa OGS na uongozi mzima wa GOSPEL SERMON MINISTRIES ambao wamekuwa bega kwa bega wakiniunga mkono na kunishauri kazi nyingi tunazotakiwa kuzifanya katika huduma hii ikiwa ni pamoja na  MR  PHILIPO PH Mungu akubariki sana.

Ninamshukuru sana Mchungaji wangu mlezi wa kanisa la TAG Bethel Mahenge  Pastor Charles Njobero Kwa kutambua huduma iliyoko ndani yangu na kunishauri kuanza kuifanyia kazi kwa kuandika  vitabu ,baba Mungu akubariki sana .

Mwisho kabisa nikushukuru wewe ambaye umeamua kupata nakala ya kitabu hiki ,wewe ndiye unayetufanya tukeshe tukimtafuta Mungu atupatie ufunuo mpya kwaajili ya kazi yake kwako.nasema MUNGU AKUBARIKI SANA.

  KUHUSU MWANDISHI.

Ezekia Chavala,ni kijana Aliyeokoka  na ameoa,yaani ni mume wa mke mmoja ambaye ni  mwanamke,na pia ni Afisa Afya kwa taaluma.

Ezekia Chavala ni mwanamuziki wa muda mrefu,mtaalamu wa kinanda na gitaa .Pia Ezekia chavala ni producer wa nyimbo za injili,na mwalimu wa muziki ,anafanya kazi za kuwaandaa kwaya mbalimbali wanaotaka kurekodi ,kuwafundisha nyimbo na kuwaingiza studio moja kwa moja.

Ezekia chavala ni mwalimu anayefundisha Muziki mitandanoni,na kwa sasa yuko na KINGDOM MUSIC SCHOOL ONLINE [KIMS] kwenye group la watsap!

Pia mr Chavala ni Mwalimu wa Neno la Mungu,anafundisha watu Neno la Mungu katika makanisa mbalimbali na mitandaoni.

Mr Chavala pia ni Mwandishi wa vitabu,majarida na makala mbalimbali za Neno la Mungu na maisha kwa ujumla wake.

Ezekia chavala pia ni muimbaji wa nyimbo za injili,na ni mwalimu  wa Kusifu na kuabudu ,na mpigaji wa vyombo kanisani.

Binafsi najisikia FAHARI kumtumikia Mungu.

Ukitaka kujiunga na shule ya muziki online[KIMS] –tuma ujumbe mfupi kwenda namba -0621029725

Kwa maswali na maoni tuandikie

chavalaezekia@gmail.com

simu;+255621029725

         +255677904755

Karibu sana GOSPEL SERMON MINISTRIES[GSM]

KAZI NYINGINE TUNAZOZIFANYA;

Tunafundisha muziki online,tunatoa articles za Neno la Mungu Online,Tunatoa ushauri wa kiafya,tunaandaa matamasha mbalimbali ,tunafundisha kuhusu ujasiliamali!

Tunapatikana   MOROGORO-MAHENGE –TANZANIA.!